LONDON, AP.- E ekonomia di eurozona a biba su mihó aña den 2017, despues di un dékada. Esaki ta un señal kla ku e zona ta rekuperando di e krísis di debe kual a lanta miedu ku e ekonomia den e region por kolèps.
E agensia di statistik europeo Eurostat a informá djamars ku e ekonomia di e bloke di 19 pais a krese ku 0,6% entre òktober i desèmber, kompará ku e tres lunanan promé.
Esaki ta nifiká ku den e konhunto di 2017, e ekonomia di euro a krese ku 2,5%, su oumento mas grandi desde 2007. Na 2016 esaki tabata 1,8%. Ademas, pa segundo aña konsekutivo, e eurozona tabatin un mihó resultado ku Merka, kual su kresementu a asendé na 2,3% den 2017.
“E kresementu ekonómiko tabatin un kresementu sustansialmente mas aselerá den 2017”, asina Bert Clijn, ekonomista di ING a indiká.
Den e dékada desde 2007, eurozona a sufri un krísis tras di otro, kuminsando ku e krísis finansiero di 2008, ku a provoká e reseshon mundial mas grandi desde Segundo Guera Mundial.
Kuater pais, Gresia, Irlanda, Portugal i Chipre, mester a wòrdu reskatá ekonómikamente pa otro paisnan den e zona euro i pa Fondo Monetario Internashonal, a kambio di ekonomisashonnan presupuestario profundo pa sanea su fiansanan. Esaki a para e kresementu ekonómiko. E ekonomia di Gresia por ehèmpel, a pèrdè un kuart parti di su Produkto Interno Bruto miéntras tasanan di desempleo i pobresa a oumentá.
