NEW YORK, MERKA.- E eks akountent di Marc Anthony, Kyle Tessiero a konfesá ku den 8 aña el a hòrta 9 mion dòler di e kantante i esaki sin ku Anthony lo por a tuma nota di esaki.
Segun ‘New York Post’, Kyle Tessiero lo mester a konfesá ayera dilanti di hues ku pa algun aña biba un bida di luho dor di hasi uso di e ‘credit cards’ pa paga biahenan karu, sali kome i bishitá klupnan di striptease.
Tur kos a bin pega na momentu ku American Express a kuminsá hasi pregunta riba algun dje gastunan riba un dje karchinan. E akountent despues di esaki a entregá su mes na polis.
E aseptashon di kulpa di Tessiero ta forma parti di un dil ku el a sera ku ministerio públiko. Den esaki el a aprobá pa bende un boto i un outo. Ku esaki e ta logra di sera 100 mil dòler pa e kuminsá paga algu dje 9 mion dòler.
Apart di esaki lo e mester sinta entre 2 pa 9 aña di kastigu di prisòn. E sentensia final den e kaso lo bira konosí den luna di sèptèmber 2018.