WILLEMSTAD.- E leyenda di tènis nashonal i miembro di Salon di Fama Isaias “Iyo” Pimentel, ayera a fayesé na edat di 84 aña.

Iyo Pimentel a nase aki na Kòrsou riba 16 di febrüari 1933. E tabatin un karera impreshonante den deporte di tènis i riba kanchanan internashonal a hunga torneonan grandi bou di bandera di Venezuela.

Iyo den su bon tempu den añanan 50 i 60 a mira akshon den torneonan grandi, manera Wimbledon, US Open, French Open i otronan.

Iyo a debutá den tènis riba kanchanan di CSC bieu na Skalo. E mes a traha un raket di palu i ku esaki e tabata hunga, te ku un dia un hende a regal’é su promé raket di bèrdat. Ku 13 aña Iyo a disidí di inskribí su mes den kampionato hubenil, kual el a gana. Na edat di 15 aña Iyo a bira kampion senior di dòbel huntu ku su ruman Ramon.

Riba invitashon di Venezuela Iyo a bai hunga un torneo ayanan i a titulá kampion. Na mes momento el a disidí na keda biba na Venezuela.

Bou di bandera venezolano ku edat di 17 aña Iyo a partisipá na weganan Sentro Amérika i di Karibe i a gana medaya di bròns. Na aña 1953 Iyo a gana e kampionato máksimo di Venezuela kual ta un título ku el a prolongá durante di 13 aña largu.

Na añanan 1961 i 1965 Iyo a partisipá na Weganan Bolivariano i a bira kampion tur dos biaha.

Den su karera tenístiko Iyo a partisipá den tur torneo grandi. Na ocho okashon el a mira akshon den Wimbledon kaminda den 1961 el penetrá te den kuart final i tabatin e honor di hunga riba “Center Court” na Wimbledon, loke pa mayoria di tenista ta un soño.

Na aña 1961 Iyo a figurá entre e promé 10 tenistanan riba ranking mundial, loke sin duda tabata algu realmente grandi.

Ku e sosegá na pas!