WASHINGTON, AP.- Un eks kolaboradó di e kampaña presidensial di Donald Trump lo deklará kulpabel den investigashon di intervenshon ruso den elekshon, segun un persona konosí ku e asuntu aki a bisa djabièrnè.
Rick Gates posiblemente ta planiando pa kolaborá ku e investigashon ku ta wòrdu realisá pa e fiskal spesial Robert Mueller.
E fuente a bisa ku Gates, un sosio di vários aña di Paul Manafort, eks direktor di e e kampaña di Trump, por presentá su deklarashon e mesun djabièrnè. E fuente, ku a papia ku kondishon pa keda anónimo a revelá kòmbersashonnan privá, a bisa ku Gates a informá tokante su desishon den un karta na su famia i amistatnan.
Gates lo ta e di sinku persona ku ta deklará kulpabel den e investigashon riba e intervenshon entre e kampaña di Trump i Kremlin durante e kampaña di 2016. Un bosero di Mueller no a rospondé na pedidonan di deklarashon.
Un hurado na Virginia a presentá su akta di 32 punto kontra Gates i Manafort, ku akusashonnan ku ta inkluí froude bankario. Esaki tabata e segundo konhunto di akusashon kontra e dos hòmbernan.
Siman pasá, un otro akto di akusashon a kousa krítika despues di eksponé un operashon amplio di intervenshon di parti di Rusia, kual a kuminsá den 2014 i kual a usa kuenta riba retnan sosial i maniobranan polítiko riba e tereno pa promové kampañanan di Trump, perhudiká esun di Hillary Clinton i sembra divishon i desakuerdo den elektorado merikano.
Gates a deklará inosente i tabata enfrentá un sanshon di posiblemente 2 aña i mei di prizòn ku kargonan pa aktua komo agente estranhero i no registrá i asosiá ilegalmente ku Manafort pa laba miónes di dòler.
