NEW YORK, USA (AFP).- Hustisia di Merka a sentensiá e eks-presidente di Honduras Juan Orlando Hernández na 45 aña di prizòn, despues ku 8 di mart último a hañ’é kulpabel di tráfiko di droga i arma. Den un oudiensia na New York, e hues Kevin Castel a kondená Hernández, di 55 aña, ku tabata presidente den dos mandato konsekutivo di 2014 pa 2022, ademas di un multa di 8 mion dollar i 5 aña di libertat bou di vigilansia despues ku e kumpli ku su kondena.
E sentensia ta un poko mas haltu ku e mínimo stipulá -40 aña pa tres akusashon- pero mas abou ku e kadena perpetuo ku ministerio públiko a solisitá.
“E papel di Juan Orlando Hernández tabata di usa su poder polítiko komo presidente di Kongreso i komo presidente di Honduras pa limitá e riesgo di e narkotrafikantenan a kambio di pago”, segun e hues den su sentensia.
“Ningun hende ta riba lei, tampoko e presidentenan”, e fiskal Jacob a bisa di su parti.
“Mi ta inosente i a keda akusá di forma inhustu i robes”, segun e eks-mandatario a bisa. E eks-presidente a yega e sala di korte kanando ku un garoti debí na un aksidente hungando futbòl, segun su abogado.
Hernandez a skucha e sentensia pará riba pia, ku e hues Castel presentando argumentonan fuerte den un sala kargá ku hondureñonan ku a akudí na e tribunal dje distrito zùit di Manhattan pa asistí na e dia históriko.
Su abogado defensor Renato Stabile a anunsiá na final dje oudiensia ku lo e apelá e sentensia ku e meta pa “anulá e kondena” i “habri un kaso nobo”, manera te awor el a reklamá sin resultado.
“Mal smak den boka”
Pa e aktivista hondureño di derechinan humano Lida Perdomo, e sentensia ta “laga un mal smak den boka”, ya ku e ta konsiderá e kondena komo “hopi abou” pa e polítiko “peligroso”, kende su “strukturanan kriminal, tantu den e poder hudisial, di polis i militar ta sigui bastante bibu” den e pais. El a spera ku lo a imponé por lo ménos dos kadena perpetuo.
Di su parti, Hernandez a fulminá kontra di “hustisia selektivo dje fiskalnan” ku a basa nan akusashon riba “testimonionan di narkotrafikantenan interesá pa haña a kambio benefishinan pa nan situashon den korte sin ku a presentá ningun prueba”.
400 Tòn di kokaina
Fiel kolaborador dje gobièrnu di e republikano Donald Trump (2017-2021), Hernandez a yega di risibí elogio di Washington pa e trabou di su gobièrnu den e lucha kontra di narkotráfiko.
Minister Públiko a akusá Hernandez di a krea un “narko estado” i di a konbertí Honduras den un “super outopista” via kua un bon parti di droga prosedente di Colombia tabata pasa.
Entre 2004 i 2022 -ku su trabou komo diputado, presidente di Kongreso i despues presidente dje pais- Hernandez a partisipá i a protehá un ret ku a manda mas di 400 tòn di kokaina Merka, ku un balor riba merkado lokal di 10.000 mion dollar.
