WILLEMSTAD.- Nina Genaro, eks relashonista públiko di ‘Curaçao Ponton Festival’ den un komunikado ku a keda emití ayera ta aklará ku e no ta forma parti dje organisashon SuMusica. ‘Primeramente mi ta lamentá e echo ku e evento Curaçao Ponton Festival a keda kanselá. Sigur mi ta komprondé e loke ku ta biba den esnan afektá pa ku e kanselashon di e festival. Ami Nina Genaro kier duna e siguiente aklarashon pa via di e komunikado aki kiko tabata mi relashon ku e organisashon SuMusica, den kuadro di e trabounan ku mi a hasi. Mi a keda aserká dor di un dirigente di SuMusica pa trabounan di Relashonista Públiko relashoná ku CPF. Mi kontakto durante di e periodo tabata mas ku esnan enkargá ku merkadeo di CPF, kual tabata esnan ku ta kordiná e ‘media tour’. Mi ke enfatisá riba e echo ku mi ta un entidat independiente, kual a keda kontratá pa hasi trabou di relashonista públiko i no ta forma parti di e organisashon SuMusica. SuMusica ta e úniko responsabel pa ku esnan perhudiká finansieramente i/òf kualkier otro forma. Mi a presta servisio na SuMusica esei ta nifiká ku mi ta un kreditor. Mi tarea komo relashonista públiko a terminá dia di e último rueda di prensa kaminda a anunsiá kanselashon di Curaçao Ponton Festival. Mi ta spera di kurason ku e organisashon SuMusica kumpli ku su obligashon pa ku tur hende ku a keda perhudiká. Mi ta bolbe enfatisá, mi NO ta forma parti di e organisashon i konsekuente no ta responsabel pa ni maneho ni desishonnan tumá. Mi ta spera komprenshon pa ku mi posishon den e suseso aki.