WILLEMSTAD.- Djasabra 10 di yüni próksimo, ta tuma lugá na Sentro di Bario Souax èksamen di baile pa partisipantenan di skol di baile ‘Souax Dance School’.
Despues di algun luna di praktiká nos bailenan krioyo, bou di guia di instruktornan sra. Noris Manuela i sr. Erwin Simon, e kursistanan ta kla pa wòrdu evaluá. Durante di e aktividat lo tin animashon di kaha di òrgel Guillermina i un dj.
Fundashon Pro Souax ta invitá un i tur pa bin disfrutá di un dushi ambiente i mira partisipantenan klousurá nan kurso di baile. E aktividat lo tuma lugá di 7’or pa 12’or di anochi na Sentro di Bario Souax i un i tur ta bon biní. Entrada ta grátis i tantu promé, komo despues di e parti di evaluashon, públiko presente ta liber pa subi dansflur i kue un par di piesa.
Bar i kushina lo ta bon surtí i lo tin vigilansia pa outo. Tambe lo tin oportunidat pa interesadonan inskribí pa e kursonan di baile nobo ku ta bai kuminsá dia 15 di yüni próksimo na Sentro di bario Souax.
Pa informashon òf inskripshon por tuma kontakto ku Sentro di bario Souax na telefòn 868-8170, 561-2832, 522-8170 òf mail via fundashonprosouax@gmail.com