WILLEMSTAD.- FKP ta mira ku satisfakshon e rekonosementu internashonal ku Bogotá a risibí pa su programa di bibienda Mi Casa en Bogotá.

Na mart 2023, Luis Felipe Henao i Simón Gaviria a presentá na FKP e eksperensianan kolombiano riba programanan di kas pa kumpra. Representantenan di e fundashonnan di bibienda di e anterior Antianan Hulandes tabata presente durante e enkuentro.

Na e momento ei, Minister Charles Cooper a ekspresá su vishon pa Kòrsou desaroyá un instrumento similar, ku por yuda yu di Kòrsou haña akseso na kompra di nan propio kas mediante un supsidio. Despues, e minister a tuma e desishon stratégiko di profundisá e konosementu di e modelonan kolombiano.

E trayekto di interkambio di konosementu akí a kontribuí na desaroyo di e modelo lokal ku awe nos konosé komo Mi Kas Awor.

Awor, tres aña despues, ‘Mi Casa en Bogotá’ a gana e ‘World Smart City Award 2026’ den e kategoria Housing, entre 533 postulashon for di 68 pais. E programa a risibí rekonosementu pa su enfoke integral, ku ta kombiná akseso na bibienda, renovashon di bario, mobilidat i inklushon.

E premio ta pa Bogotá, pero e mensahe ta universal: un programa di bibienda bon strukturá por transformá bida, bario i ekonomia.

FKP ta felisitá Bogotá i tur e ekspertonan ku a kompartí nan konosementu ku Kòrsou. E rekonosementu akí ta reafirmá ku e direkshon ku Kòrsou a skohe ku Mi Kas Awor ta relevante, moderno i basá riba eksperensia internashonal.

“Un vishon ku a kuminsá ku interkambio di konosementu, awe ta bira un instrumento propio di Kòrsou pa yuda mas famia bira doño di nan propio kas.”