WILLEMSTAD.- E akshon di ‘Early Bird’ pa Curaçao Ponton Festival tabata un éksito na Van den Tweel Zeelandia. Djasabra último, un gran kantidat di bishitantenan di e festival a para den rei for di 9’or di mainta pa kumpra un karchi general i karchi ‘VIP’ na un preis redusí.
Siman pasá organisadó Sumusica Curaçao B.V. a anunsiá un akshon di ‘Early Bird’ pa duna mas tantu hende posibel e oportunidat di presensiá Curaçao Ponton Festival. E benta ofishal di e akshon di ‘Early Bird’ tabata durante 10’or di mainta i 6’or di atardi. Tin hopi interes pa e promé edishon di Curaçao Ponton Festival i e benta di karchi ta un muestra di esei.
Mas ku 1000 karchi di e festival a wòrdu bendé na un preis redusí. “Mi ta sumamente kontentu ku e reakshonnan positivo ku nos a haña. Personanan di diferente edat na Kòrsou i otro paisnan ta reakshoná ku entusiasmo tokante e ‘line’up’ di e festival. Esaki ta duna nos energia pa realisá ku Curaçao Ponton Festival ta bira un evento anual”, Gisgard Felida, direktor di Sumusica Curaçao B.V. a indiká.
Dia 5,6 i 7 di aprel e promé edishon di Curaçao Ponton Festival ta tuma lugá riba Brionplein iKleine Werf.  E festival di muzik ta konsistí di un programa atraktivo ku artistanan lokal i internashonal.