WILLEMSTAD.- Durante di wikènt tras di lomba a tuma lugá na Pietermaai e di 4 edishon di Curaçao International BlueSeas Festival. Ounke e género di músika Blues no ta masha popular na Kòrsou, e evento di BlueSeas Festival a pèrkurá durante dje último 4 añanan atraé un bon públiko na e evento i mester indiká ku e kalkulo e aña aki ta ku e evento a superá e kantidat di públiko di añanan anterior. E presentashon musikal riba tantu djabièrnè i djasabra tabata sublime. E artistanan ku sigur a impreshoná tabata riba djabièrnè anochi e kitarista Eric Gales ku a presentá den Bar 27 kaminda no tabatin lugá pa pone hende pa por a presensia e presentashon di Gales. Músikonan lokal renombrá tabatin masha bon komentario mes di Gales ku ta ser konsiderá un héroe kitarista mundialmente. Riba djasabra anochi tabata e dama saksofonista, Vanessa Collier ku a impreshoná ku su presentashon. E damita ku a kuminsá toka saks ku 9 aña i kende ta gradua pa dos diferente kuríkulo na Berklee College of Music a presentá un repertorio ku kapta atenshon i kai na agrado dje públiko. Mester remarká ku e aña aki e organisashon dje evento, Fundashon Bon Intenshon huntu ku MOJO i brandingpartner MCB a hasi algun adaptashon na e tarimanan loke a hasi posibel ku mas hende por a presensia e presentashon dje artistanan, algu ku sigur a kai na agrado. Pabien na e organisashon i tambe na e distrito di Pietermaai ku un biaha mas a resaltá pa e ambiente den e bario chikí. Riba fotonan nos por apresiá e presentashon di diferente dje artistanan i tambe públiko disfrutando. Potrètnan pa kortesia di Quincy Lopez.