WILLEMSTAD.- Djasabra a tuma lugá otro eksitoso Jump In di Grupo T’aki Tin. E evento ku ta tuma lugá na Landhuis Brakkeput Mei Mei a ‘sold out’ i un biaha mas a resultá den un tremendo ambiente.
Pa e último añanan Grupo T’aki Tin ta organisá e ‘Jump In’ ku e meta pa hasi un donashon na Karnaval di Kòrsou, prinsipalmente na gruponan Tiner i Hubenil.
Djasabra esaki tabata e kaso un biaha mas, e biaha aki Rei di Tumba, Ray Lauffer tambe a hasi un donashon dor di pone su pago pa e presentashon dje anochi ei komo donashon. Riba potrètnan nos por apresiá parti dje ambiente i tambe e momentu kaminda direktiva di Grupo T’aki Tin ta entregá un chèk simbóliko di 25 mil florin na Juni Aniceta di Fundashon JAG komo donashon pa Gruponan Tiner i Hubenil.