WILLEMSTAD.- Djabièrnè anochi a tuma lugá den sala di PWFC tabatin presentashon di ‘The Wizard of Oz i The Lion King’. Un sala yen a disfrutá di e show presentá pa talentonan nobo ku a ser kultivá ku masha delikadesa dor di Ana Aalse.
E show a konta ku un repertorio variá di músika agradabel ku a permití kada artista bria. Un felisitashon pa henter e tim ku a yuda produsí e show musikal, un anochi kaminda zonido, efekto di lus, vestuario, maneho di tarima i e kantantenan a krea e fantasia musikal ku e públiko sigur a disfrutá di dje.
Emoshonante i impreshonante pa mira nos hóbennan partisipá den proyektonan edukativo, hasiendo bon uso di nan talentonan bou di guia di Ana Aalse. Nos tin sigur ku nos lo sigui tende hopi mas di e hóbennan, komo artistanan lokal, den futuro lo subi tarima internashonal. E reportahe gráfiko ta duna un impreshon dje show ku a keda presentá. Potrètnan pa kortesia di Tico Vos.