WILLEMSTAD.- Den e wikènt di Labor Day Merikano, di 29 pa 31 di ougùstùs a organisá e di nuebe edishon di CNSJ na Curaçao World Trade Center. E edishon di e aña aki, igual na esun di aña pasá a ofresé un konsierto grátis riba djaweps 29 di ougùstùs, ku Juan Luis Guerra, Aymée Nuviola i Havana D’ Primera.
Manera semper e festival a ofresé un line-up di super artista ku e aña akí a inkluí: Maroon 5, Mariah Carey, PittBull, Kenny G, Michael McDonald, David Sanborn, Gladys Knight, Third World, i Nicky Jam.
5,008 bishitante internashonal a bai e festival. Pa promé biaha den su historia ta tin mas bishitante internashonal kompará ku esnan lokal. Mayoria di e bishitantenan internashonal ta di region, loke tambe ta un trènt nobo.
Bishitantenan internashonal a gasta US$2,522 pa nan trep pa persona, i US$413 pa dia pa persona. Pa persona nan a gasta10.3% mas tantu ku festival di 2018, kaminda nan a gasta pa persona pa dia US$343, i 33% mas ku den aña 2015 (US$311). E montante ku’n persona a gasta pa dia e aña aki ta kasi dos biaha i mei mas altu ku loke e turista promedio ta gasta pa dia (US$171.00).
E gastunan di CNSJ 2019 ta balorá na US$11,005,669, miéntras ku ta balorá e kontribushon di e di 9 edishon di CNSJ na ekonomia di Kòrsou na US$17,121,099. Total e kontribushon di e festival na ekonomia di Kòrsou ta igual na dos dia Kòrsou su GDP. E balor promoshonal di e festival aki ta algu inmenso, ya ku CTB ta kalkulá ku a yega na mas ku 22 mion kas den Latino Amérika so.
Por lo general bishitantenan ta mas ku 90% satisfecho ku e festival, i a ekspresá nan satisfakshon pa loke ta trata e line-up di artista i nan presentashon. Pa un festival di músika e sifranan aki ta impreshonante. Den mesun rosea, bishitantenan ta masha positivo pa regresá Kòrsou pa e festival i pa rekomendá e festival aki na otronan.
E festival a krea un núkleo fuerte di fanátiko ku ta identifiká nan mes klaramente ku CNSJF i ku e propósito firme di regresá, kada biaha ku tin e festival akí.
E festival a bira manera un ritual pa e bishitante internashonal, paso nan ta eksperensia un tremendo ambiente, e kuminda ku nan ta kome, amigunan ku nan ta topa, fortalesé amistat nobo i e memorianan ku nan ta krea. E festival ta keda atraé míles di bishitante internashonal pa Kòrsou, kreando asina hopi oportunidat pa hasi negoshi.