STO. DOMINGO.- Dies hende a muri despues ku a surgi eksploshon den un tienda na República Dominicana, ainda tin 11 pèrdí, miéntras ku 37 otro ta heridá, esei di akuerdo ku e presidente Luis Abinader ku a duna di konosé ayera. E eksploshon aki a sakudí e aria komersial di San Cristobal, ku ta na un 30 kilometer for di e kapital di Sto. Domingo, lagando un bola di kandela i hopi huma.
Abinader a bishitá e sitio dje eksploshon i a manda palabranan di kondolensia na famianan di esnan ku a fayesé, entre nan hòmber, muhé i mucha. “Nos ta hasiendo tur loke ta humanamente posibel pa investigá loke a sosodé i buska e 11 personanan ku ta pèrdí. Tin alrededor di 37 hende ku ta hospitalisá”, el a bisa. E kousa dje eksploshon mes no a keda revelá ainda.
