WILLEMSTAD.- Debí na interes enorme pa e kortometrahe ‘Sin Ayo’ di Elizabeth Francisco i e dokumental ‘Yamada’ di Sharelly Emanuelson, CIFFR a tuma e desishon pa pone un èkstra funshon pa ámbos pelíkula. Tur dos pelíkula lo keda presentá djadumingu awor, 15 di aprel pa 2.30 di atardi den sala 3 di ‘The Movies’.
E dokumental ‘Yamada’ ta sigui Grupo Serenada durante di nan grabashon di nan DVD i ta laga bu mira e focus i dedikashon, amistat, lealtat inkondishonal i disiplina ta e elementonan mas prinsipal ku ta duna un aporte na e trayektoria dje grupo. Ambos presentashon durante di Curaçao International Film Festival Rotterdam a keda bendí den 1 dia.
Den e kortometrahe, ‘Sin Ayo’, ta para ketu na e akontesimentunan ku a tuma lugá durante e mainta di 6 di novèmber 1967 na momentu ku Julianabrug a kai. E pelíkula di Elizabeth Francisco ta partisipando pa ‘Caribbean Shorts Award 2018’. Pa e pelíkula aki tambe tur karchi a kaba pa su presentashon durante dje festival di sine.
E èkstra presentashon di ‘Yamada’ ku den antesala e kortometrahe ‘Sin Ayo’ ta tuma lugá djadumingu awor, 15 di aprel pa 2.30’or di mèrdia den sala 3 di ‘The Movies’ na Waaigat.
Karchinan pa e èkstra funshon ta optenibel solamente na e takia di The Movies. Awe e takia ta habri pa 4’or di atardi, miéntras ku djasabra i djadumingu e takia ta habri 12’or di mèrdia.
Curaçao International Film Festival ta tumando lugá te ku djadumingu awor na ‘The Cinemas’. Pa mas informashon relashoná ku e programa por bishitá e wèpsait: www.curacaoiffr.com