PARIS, FRANSIA (AFP).- Ekstremo derecho a gana e promé buèlta di elekshon parlamentario krusial na Fransia, den kua e forsanan di sentroderecha dje presidente Emmanuel Macron a keda na di tres lugá tras di iskierda, segun e promé kálkulonan.
E partido ultraderechista National Rally (RN) di Marine Le Pen i su aliadonan lo logra alrededor di 33% dje votonan, pero mester warda e di dos buèlta dia 7 di yüli pa sa si nan ta alkansá e mayoria apsoluto den Asamblea Nashonal.
“Nos tin mester di un mayoria apsoluto”, Le Pen a bisa dilanti di su simpatisantenan na Henin-Beaumont, den nort di Fransia, kaminda el a keda reeligí komo diputado. “Fransesnan a emití un veredikto rotundo”, segun su kandidato pa promé minister, Jordan Bardella, for di Paris.
E aliansa di Macron lo logra den kareda di 22% di votonan, tras di e koalishon iskierda New Popular Front Alliance (NFP), ku lo haña alrededor di 28%, segun e kálkulonan dje instituto di sondeo IFOP.
E yegada na poder di ekstremo derecho, pa promé biaha for di despues di liberashon di Fransia di okupashon di Aleman nazi den1945, lo presentá un pais nobo den Union Europeo goberná pa e tendensia ei, meskos ku t’e kaso na Italia.
E resultado por debilitá e polítika di apoyo di Ukrania di parti di Macron, ounke e partido di Le Pen, di kua su rivalnan ta konsiderá ku e ta hopi serka dje Rusia di Vladimir Putin, ta sigurá ku nan ta apoyá Kiev i ke evitá un aserkamentu ku Mòsku.
