MERKA.- E albùm ku ta kontené 11 komposishon a keda lansa djabièrnè último pa Sony Music Latin ta ofresé e vershonnan nobo di éksitonan manera ‘Dueño de nada’, ‘Voy a perder la cabeza por tu amor’ i ‘Tengo derecho a ser feliz, interpretá na duo ku e astro mehikano Vicente Fernandez, e kantante spañó Amaia Montero i e Argentina, Soledad Pastorutti, respektivamente.

Den e klásiko ‘Pavo Real’ e ta keda kompañá pa e músiko merikano, Nile Rodgers riba kitara i den ‘Por si Volvieras’ pa e kantante mehikano, Carlos Rivera. E promé single ku a keda lansa den luna di mart, un vershon di su klásiko di 1980 ‘Culpable soy yo’, ta un duo ku e astro portorikeño, Chayenne.

Montaner a deklará ku Rodriguez a graba tur e kansionnan dje albùm. ‘Loke e públiko ta bai skucha ta e bos inkonfundibel di ‘El Puma’ di awe. El a graba tur di nobo ku areglonan moderno sin pèrdè e esensia ku e éksito ku nan tabata’, asina e kantaoutor i produktor kende ademas a kompañá Rodriguez den ‘Silensio’ i den e himno ‘Agarrense de las manos’ huntu ku Montero, Rivera, Fonseca, e spañó India Martinez i e Venezolanonan Gusi, Chino Miranda i Yordano.

E idea dje disko a bin di Montaner komo un homenahe na ‘El Puma’ kende a debutá na 1967 i ku for dje tempu ei a lansa kasi 50 produkshon musikal, entre nan produkshon di studio i kompilashon di éksito.

‘El Puma meresé e tributo aki’, asina Montaner a a indiká. ‘E tabata e promé artista Venezolano ku a sali internashonalmente i ku tantu éksito. Despues di dje nos tur sobra a bin, mi ta kere ku e grandinan bo tin ku duna nan un homenahe na momentu ku nan por disfrutá di dje. Esaki ta e momentu pa Jose Luis i Iberoamerica ta gradisié pa su aporte komo artista na e kultura i union di pueblo’, Montaner a terminá bisando.