MIAMI, MERKA.- E kantante venezolano, Jose Luis Rodriguez, ‘El Puma’, ta rekuperando satisfaktoriamente di e operashon di dòbel transplante di pulmon ku a tuma lugá durante di wikènt último na Miami, asina un fuente serka dje famia a informá ayera.
E kantante di ‘Pavo Real’ i ‘Dueño de ti’, a keda operá na e hospital Jackson Memorial di un enfermedat inkurabel di pulmon ku a oblig’é pa biba ku bòm di oksígeno, motibu pa kua pa algun luna kaba e tabata warda riba pulmonnan kompatibel.
Oswaldo Muñoz, amigu personal di e kantante a indiká ku ‘El Puma’ ta den sekshon di kuido intensivo i ku solamente su kasá, Carolina Perez tin outorisashon pa bishit’é.
E forma ku e kantante ta reakshonando a pone ku e dòkternan ta optimista i ta mihó di loke nan a premirá.