WILLEMSTAD.- Manera ta kustumber pueblo di Kòrsou tin e plaser di disfrutá di un evento musikal den e dianan di fiesta durante fin di aña. E aña aki lo no ta un eksepshon. E evento musikal  ta karga e nòmber di 'Thnxgiving Concert'' i wòrdu di spònser pa El Tributo.
El Tributo ta yama danki ku “Thnxgiving Concert”. Paso músika ta esensial den hopi di nos su bida. Nos ta skucha músika ora ku nos lanta for di soño, den tráfiko, na trabou i huntu ku nos sernan kerí. Esaki por trese felisidat i motivá nos, pero tambe kompañá nos den momentu difísil i aliviá nos preokupashonnan.
Músika no ta toka nos solamente na un manera intelektual, sosial òf emoshonal, pero tambe na un manera spiritual. Ta netamente esei El Tributo ke brindá pueblo di Kòrsou.
“Thnxgiving Concert” lo tuma lugá djadumingu 26 di novèmber próksimo, for di 10’or di mainta te ku 12’or di mèrdia, aya na Morada Santa Bottelier. Un konsierto kaminda artistanan di taya ta bai deleitá un i tur presente ku dushi músika.
Ku aktuashon estelar di Randal Corsen & Friends, Kris Berry, Jean-Jacques Rojer, Dibo Doran i doña Mafalda Minguel. Entrada lo ta grátis.
Bin selebrá bo herensia musikal i yama danki na tur esnan ku a bai nos dilanti lagando tesoronan kultural atras.