WILLEMSTAD.- Fundashon J.A.G. e  wikènt aki lo tin na su enkargo diferente elekshonnan pa asina por skohe e partisipantenan ku lo bai karga nos diferente marchanan pa ku Karnaval 2018. Esaki lo ta na enkargo di Shurendi Pieternella i su tim di Incredible Decor.
Lo bai tin un tremendo shou i presentashon di nos partisipantenan ku a bin ta ensayá hopi fuerte pa por duna un tremendo shou.
Djabièrnè 19 yanüari lo tin elekshon Rei i Reina Tiner 2018, na Kleine Werf kuminsando pa 7’or anochi i plania pa terminá 1’or di mardugá. Karchinan ta optenibel na Sede Fundashon J.A.G. na Havenstraat z/n. Teatro Luna Blou, Zona Kultural i serka tur partisipante.
Djasabra 20 yanüari 2018, lo tin elekshon Grandi, na Kleine Werf ku lo kuminsá pa 8’or di anochi i terminá pa 2’or di mardugá. Karchinan tambe pa e elekshon aki ta optenibel serka tur partisipante i na Sede di Fundashon J.A.G. na Havenstraat z/n, telefòn 465-4495.
Djadumingu ta toka turno na nos hóbennan. E elekshon hubenil lo tuma lugá na Sambil Shopping Mall i entrada pa e evento aki ta grátis. Esaki ta un regalo di Fundashon J.A.G. ku despues di apertura dia 6 yanüari por a hasié posibel i Sambil Mall. E elekshon ta kuminsá 3’or di mèrdia pa 8’or di anochi den FoodCourt di Sambil.
Henter pueblo di Kòrsou espesial e fanátikonan di tur e partisipantenan ta keda invitá pa bin apoyá nos hóbennan pa asina engrandese nos karnaval.
Pa kualke informashon por tuma kontakto ku Fundashon J.A.G. na 465-4495 òf na sede situá na Zona Kultural / Teatro Luna Blou, Havenstraat z/n.