WILLEMSTAD.- Djaweps último, e partisipantenan na Miss Teen Curaçao International 2019, Davica Demali, Shaqira Noor, Loeshemalies Basilia, Giannelly Koeijers, Marlusha Americaan Ashanty Crispulo i Giorliana Veld tabatin kòmbersashon ku hurado, kua ta un di e partinan hopi importante pa ku e elekshon final.
Banda di e kòmbersashon, nan a presentá tambe nan proyekto na komunidat dilanti di un kuerpo di hurado. E aña aki e proyekto tabatin komo tema e konsientisashon  tokante e malesa kanser na pechu.
Kada partisipante a haña un dama ku a sobrebibí òf ku tin e malesa di kanser na pechu komo nan guia pa a logra e proyekto aki. E anochi aki tambe tabatin e preliminar interno pa e premio Miss Best Body.
E elekshon final di Miss Teen Curaçao International 2019, “Welcome to Curaçao” ta tuma lugá awe djasabra di 8or pa 11or di anochi na Santa Barbara Resort.
Riba e anochi aki, lo skohe: Miss Teen Curaçao International (Miss Teen Mundial) 2020, Miss Teen Universe Curaçao 2021, Miss Teen Americas Curaçao 2020 i Miss Teen Grand Curaçao International 2020.
Karchi ta optenibel serka tur partisipante i tambe serka sra. Christy Dania, na ofisina di Curaçao International Crowned Queens Foundation na Rooseveltweg 105-105D, edifisio ariba di edifisio di Highlights, telefòn 681-4390.