MAUMEE, OHIO, MERKA (AP).- Presidente Barack Obama ayera a defendé su polítikanan ekonómiko, sigurando e merikanonan ku e próksimo elekshon lo definí e perspektivanan di kresementu di e pais den e próksimo dékada i mas despues. Kuminsando un gira di dos dia na nort di Ohio i wèst di Pennsilvania, Obama a bisa di ta konvensí ku e votadónan no a pèrdè interes den e elekshonnan di novèmber apesar di e aktual stankamentu polítiko den Kongreso. E presidente a afirmá ku si su rival republikano, Mitt Romney, yega Kas Blanku, e lo apliká polítikanan ekonómiko na fabor di e rikunan na kuenta di e klase media. Obama a bisa di ta dispuesto na traha ku ‘kualkier hende ku kere ku nos ta huntu den esaki’.
E akto tabata e promé evento di kampaña despues ku Korte Supremo a dikta siman pasá na
fabor di su reforma di e sistema di salú públiko. Obama ayera a defendé e kambionan radikal den e sistema.
‘E lei ku mi a dekretá ta aki pa keda’, asina el a bisa. ‘Lo mi pone ku mayoria di e merikanonan ta mas sigur’.
E presidente a suprayá ku un industria di outo fuerte a yuda tantu e ekonomia di Ohio komo esun di Pennsilvania. El a sigurá ku un planta di Jeep na Toledo ta kontratando.
Obama a bisa ku loke ámbos estado ta eksperimentá, kaminda e desempleo ta bou di e promedio nashonal, por ripití den hinter e pais. El a agregá ku e ta postulando pa un di dos mandato pa sigurá ku asina ta.
‘
Tin algun hende ku ta pustando ku boso lo pèrdè interes, ku ta pustando ku boso ta bai pèrdè e ánimo di algun manera, pero ata boso aki, apesar di e kalor’, asina Obama a bisa, ku kamisa manga kòrtiku bistí riba un dia ku solo i húmedo ku a oblig’é seka e sodó di su kara. ‘Mi ta pusta ku boso no ta bai pèrdè interes. Mi ta pusta ku boso no ta bai pèrdè ánimo. Mi ta sigui kere den boso i mi ta bai pusta pa boso. E pais ta pustando pa Ohio’, el a agregá. Maumee tabata e promé parada di e gira di 402 kilometer, ku Obama ta realisá den un bùs ku Servisio Sekreto a aprobá. Obama ta bishitá vários komunidat na nort di Ohio kaminda el a risibí un apoyo fuerte den e elekshonnan presidensial di 2008. E biahe lo hib’é tambe na wèst di Pennsilvania, ku ta inkluí un eskala na Pittsburgh. Obama kuater aña pasá a gana Ohio i Pennsilvania, pero Romney i e republikanonan ta hasiendo hopi esfuerso pa gana ámbos estado. Faltando kuater luna pa e elekshonnan, e sondeonan
ta mustra Obama levemente dilanti di Romney na nivel nashonal i den vários estado ku ta kla den e búskeda di e 270 votonan elektoral nesesario pa gana e elekshonnan di dia 6 di novèmber.