WILLEMSTAD.- Ayera tardi Fundashon Kultural Seú Kòrsou a tene un rueda di prensa kaminda nan a duna detaye di diferente aktividat.
Pa kuminsá nan a anunsiá kuater tronkon pa Festival di Seú 2020. Anteriormente FKSK a presentá Jessy Waal i Glenn Thomas komo e baluartenan na kende Festival di Seú 2020 ta keda dediká.
Ayera e organisashon a presentá Doña Elia Isenia, Rudy Rooi, Marlene ‘Chuki’ Scharbaai i Cenaida van Dinter komo e kuater tronkonnan pa selebrashon di Seú 2020.
Rudy Rooi i Doña Elia Isenia ta dos tronkon máksimo di Kantadó Mayo, Sra. Marlene ‘Chuki’ Scharbaai ta e tronkon pa Reina Seú i Sra. Cenaida van Dinter ta e tronkon pa e kompetensia di Maramentu di Lensu.
GRUPONAN
Lionel Jansen, presidente di FKSK a anunsiá ku tin un total di 48 grupo partisipando na Marcha di Seú 2020, aña pasa e kantidat tabata 43 grupo, pues un oumento di grupo. Jansen a indiká ku e ta spera ku pueblo di Kòrsou lo sali nan kas pa apoyá e gruponan tantu na e Marcha di Seú di Pariba komo esun di Bándabou.
KURMENTU VEHIKULO
Riba dianan 28 i 29 di mart lo tin kùrmentu di vehíkulonan ku ta partisipá na e diferente marchanan. E sitio di kùr ta e lugá di parker di CPS na Nieuwe Haven. Dia 4 di aprel ta programa pa e ‘herkeuring’ tuma lugá.
KANTADO MAYO
Awe, 11 di mart ta fecha pa entrega di letra. Esaki por sosodé di forma digital te ku 12or di anochi, asina e komishon organisadó di Kantadó Mayo a informá ayera. Mañan, djaweps FKSK i Komishon Organisadó di Kantadó Mayo a invitá gruponan rítmiko pa un enkuentro pa 7or di anochi na Sede di ABVO na Brievengat kaminda lo saka e órden di presentashon pa e anochi preliminar di Kantadó Mayo. Despues lo tin un charla di hurado kaminda lo kompartí informashon importante ku e gruponan rítmiko partisipando na Kantadó Mayo 2020.
KAMBIO
Carlos Zimmerman, miembro di direktiva di FKSK a indiká ayera, manera ‘DEN E BEMBE’ a informá anteriormente, ku e organisashon lo hasi uso di su propio stage i lo no hasi uso dje stage grandi di Festival Center. E intenshon ta pa trese algun kambio pa loke ta trata e ‘set up’. Lo pone e stage na un manera ku e kuerpo di hurado lo por hasi uso di e mesun sitio ku hurado pa Festival di Tumba ta sinta.
‘Si palu bira tronkon, balor ta na su renchi’