WILLEMSTAD.- Eligia Martier ayera a selebrá ku su studiantenan dia di San Valentino i Karnaval. E aktividat a kuminsá ku reflekshon riba e tema di amor i amistat kaminda dosente i studiantenan a hiba palabra riba e tema aki. Na final di e parti aki e kantante romántiko popular bou di hubentut Randy Leroy a presentá partiendo rosa i deleitá tur presente ku su kansionnan romántiko.  Despues di un pousa a sigui e parti karnavalesko kaminda tumberonan hóben popular a presentá. Tabata presente Richi Rich, Amos Balentin, Ray Lauffer, tambe e divanan di ambiente Lady Lava ku Gigi. Pa kaba di koroná obra Rei di tumba 2019 Dibo Doran i su banda ONE a entretené e hóbennan den un tremendo jump in. Mester bisa ku kada kantante tabatin un mensahe edukativo, pa formashon di e hóben. Esaki den kuadro di meta di e aktividat kaminda ta trata di hasi skol sosial pa asina atraé e studiante pa forma su mes pa medio di estudio den un skol sosial pa asina e por logra mas den ambiente sano i agradabel. Esaki ta parti di e trabou komo edukadó; pa duna studiante de bes en kuando loke nan ta gusta nèchi den un forma strukturá den skol, pa asina nan por haña e hóben den skol pa primi saka lo máksimo posibel pa mañan e hóben ta forma den su totalidat i ku el a logra lo máksimo di su kapasidat.