INGLATERA.- Elton John i su pareha, David Furnish a aseptá un montante basta grandi na daño i perhuisio di e korant ‘The Sun’, esaki despues ku nan a publiká un artíkulo kaminda nan ta informá ku un kachó di e pareha lo mester a sòru pa heridanan stail di ‘Freddy Krueger’ na kara di un hóben. ‘Freddy Krueger’ ta un personahe for di un pelíkula di horor ku su kara ta yen di buraku.
Den luna di febrüari 2018 a sali un publikashon den ‘The Sun on Sunday’ ku e kabes ‘Elton’s dog did this to my girl’. E mesun artíkulo a aparesé tambe riba e wèpsait dje korant i a keda publiká tambe pa tres otro medio di komunikashon.
Den e artíkulo nan ta indiká ku un mucha ku tabata hungando na kas di Elton John i David Furnish lo mester a keda ataká pa nan kachó i a risibí heridanan grave i ku aparentemente e pareha nunka mas a informá riba estado di salú di e hóben.
‘Esaki no ta bèrdat’, asina e abogado di John i Furnish a indiká na un otro medio di komunikashon. ‘ E heridanan no tabata grave i John i Furnish na diferente okashon a puntra mayornan di e hóben riba estado di salu dje mucha. Kada biaha nan a tende ku ta bai bon ku e mucha.
Den e akuerdo ku ‘The Sun’ a yega ku John i Furnish a keda kumbiní ku lo pidi diskulpa den e korant i ku e pareha lo risibí un montante basta grandi na daño i perhuisio.