WILLEMSTAD.- Den luna di mart 2018 via di e bufete di abogado DK Legal, ku Sr. David Kock na kabes, a tuma lugá un presentashon di SOCAN, e agensia kanades internashonal di registro di kansion, aki na Kòrsou, Aruba i Boneiru.
E presentashon a toka e tema di uso komersial di kansionnan di artistanan lokal i internashonal. Pa por hasi uso di e kansionnan mester paga DUCAPRO, ku ta e agensia ku ta representá nan derecho. Dia a hasi e presentashon a presentá e konsepto a hasi esaki indikando ku mester paga un suma di plaka pa kada es ku e kansion dje artista wòrdu toka. E pago lo pèrkurá pa e artista tambe por benefisiá for di e uso komersial di su kansion ku ta toka na por ehèmpel un emisora.
Despues dje reunion tabatin un reakshon hopi miksto na tur tres isla. Kompositor i músikonan mes ku a mira e peliger ku nan kansionnan lo no wòrdu toka mas na radio tambe a duna nan opinion indikando entre otro ku tur tempu ta medionan di komunikashon a duna nan sosten.

1 di yüni 2018
Ayera nos por a tuma nota via dje portal ‘Noticia Cla’ di Aruba ku e bufete di abogado DK Legal a manda un karta siman pasa pa tur radio emisora kaminda ta informá nan ku entrante 1 di yüni 2018 nan mester paga DUCAPRO e suma mensual di 3000 florin pa tin derechi riba uso komersial di kansionnan di un lista grandi di artistanan lokal i internashonal afiliá na e organisashon.
Si un radio emisora no afiliá, lo kobra nan i òf nan lo risibí un but pa kada bes ku nan toka un kansion ku ta registrá na DUCAPRO.
Na Aruba tabatin reakshon di algun emisora ku a informá ku no ta deskartá e posibilidat ku nan lo kambia nan format di un musikal pa un di papia so. Ayera nochi ‘DEN E BEMBE’ a tuma nota tambe dje reakshon for di Boneiru i nos ta pendiente pa tende reakshon di direktornan di radio emisoranan lokal riba esaki.