MERKA.- Emma Stone no solamente a logra un Oscar komo mihó aktris komo protagonista den e pelíkula ‘La La Land’, pero el a logra alkansá puesto di honor riba e lista di Forbes komo e aktris mihó pagá.
E aktris di 28 aña, a terminá na kabes dje lista ku 26 mion dòler na entrada, esaki sigur no ta un sorpresa konsiderando e éksito grandi di ‘La La Land’, ku a logra un entrada estimá na 445.3 mion dòler na takia.
Stone a surpasá Jennifer Aniston, kende a terminá na di dos lugá ku un entrada di 25.5 mion dòler. Jennifer Lawrence a terminá na di tres lugá ku 24 mion dòler na entrada, nèt algu riba e mitar di loke el a gana na 2016 ku tabata 46 mion dòler.
Djis pa pone den perspektiva, e tòp 10 di aktrisnan mihó pagá a logra akumulá un total di 172.5 mion dòler na entrada, den kaso di e aktornan, e tòp 10 di 2016 konhuntamente tabatin un entrada di 457 mion dòler. Esaki ta duna ketu bai e indikashon ku e lucha pa igualdat den pago mester kontinuá na Hollywood.