WILLEMSTAD.- Ayera nochi na Kleine Werf, ‘Curaçao Carnival Village’ a tuma lugá e elekshon di Rei i Reina Tiner 2018.
Kuater duo representando dos skol i dos organisashon sosial a kompetí i mester bisa ku e hóbennan a demostrá nan talento durante di nan presentashon.
PREMIASHON:
Liguruensly Leito i Ana Gabriela La Crus di e grupo ‘I Love Hip Hop & R&B’ a keda komo e di tres finalista i a gana premio pa ‘Trahe Mas Kreativo’ i nan tabata e duo ‘Mas Popular’.
E di dos finalista a resultá Chandel Beker i Sharetty Mercelina di ‘S.A. Carnival Group’ kendenan a gana tambe e premio pa ‘Trahe Mas Impaktante’. Junny Pieter i Roxenia Rozal di ‘Skol Avansa Amador Nita’ a risibí premio komo ‘Mihó Show’ i a resultá e promé finalista.
Finalmente a koroná Emmanuel Cathalina i Giany Everon di CDC/UDC komo Rei i Reina Tiner. Apart di sali e ganadó apsoluto e duo a gana premio pa ‘Mas Dinámiko’ i ‘Mas Amistoso’ i nan diseñadó, Norman Rijke a gana e premio komo ‘Mihó Diseñadó’. Pabien na e ganadónan!