WILLEMSTAD.-‘Hermana Isla‘ ta un komposishon toká pa hóben lokal pa ekspresá nan sosten i kombibensia ku pueblo di Sint Maarten. Ta distribuí e komposishon akí grátis via cd, Youtube i social media i por skuch’é na emisora di radionan na Kòrsou i Sint Maarten.

‘Hermana Isla; ta un komposishon di pianista lokal Norman Moron i Enrico Henriquez, el a areglá e komposishon. ,,E idea pa ‘Hermana Isla a surgi ora nos a mira e promé imágennan despues ku orka Irma a pasa,” asina direktor Carolina Nicolaas di skol di muzik i produktor di e proyekto a bisa.

,,Nos tabata di shòk i a kompartí esei via app ku otro miéntras nos tabata klabá na televishon. Mesora nos a sinti nesesidat di ekspresá nos sentimentu ku muzik.” Su manisé e promé vershon di e komposishon di Moron i Henriquez tabata kla.

Despues di skol a aserká algun studiante i dosente di Akademia di Músika Edgar Palm di Sentro Kultural Kòrsou, Moron i Henriquez ta duna lès ei. Ora di skohe e tokadónan esnan ku un laso familiar ku Sint Maarten a haña preferensia.

Spònser anónimo a sòru ku por a hasi e grabashon. A skohe konsientemente pa no kobra pa toka den e grabashon di e cd i pa no bend’é tampoko. ,,Tur hende a traha ku alma i kurason na e proyekto akí. Pueblo di Sint Maarten ta den nos pensamentu, i nos kier a ekspresá esei pa medio di muzik.

Nos ke pa grandi i chikí na Sint Maarten sa ku nos ta kòrda riba nan i ku nos ta spera ku nan no ta laga e kos akí tumba nan. Nos ta spera ku e komposishon akí por motivá hende ku no a hasi un donashon, pa hasi esei ainda via Krus Kòrá òf otro instansia ofisial,” asina Nicolaas a komentá.

“Hermana Isla’ ta un grabashon instrumental toká pa fió, alt saksofon blòkflùit, kitara akústiko, bas, piano i drùm, na kuminsamentu i fin di e komposishon tin un teksto grabá. E músikonan ku a partisipá ta Caleb Ruiz, Carol Ann Casseres, Juanita Adriaens, Justin Panneflek, Alexander Brownbill, Winchi Andrea, Maril Boersema, Steve Teunis, Arjen de Graaf i Enrico Henriquez.

Por skucha Hermana Isla riba youtube  https://youtu.be/P3z7HvCbHBk