WILLEMSTAD/NEW YORK.- E empresario hamaikino Adam Stewart a keda nombrá entre e Filántroponan di Aña 2026 pa e revista Town & Country, risibiendo rekonosementu internashonal pa e trabou di karidat ku ta realisá e.o via Sandals Foundation.

Stewart, ta presidente ehekutivo di Sandals and Beaches Resorts i ATL Group. Sandals Foundation ta bon konosí na Kòrsou komo esun ku ta kontribuí huntu ku Ajax pa material i train muchanan di skol pa hunga futbòl. Tambe ta regalá skolnan i klupnan material pa edukashonal.

Pues e trabounan i esfuersonan boluntario di Sandals i Adam Stewart no ta deskonosí pa Kòrsou.

Stewart a risibí e rekonosementu durante e di 13 edishon anual di e “Philanthropy Summit” di e revista, ku a tuma lugá na Hearst Tower na New York dia 27 di òktober último.

E distinshon ta rekonosé e sosten di Sandals Foundation na inisiativanan den henter Karibe, entre otro asistensia despues di orkan, konservashon di medio ambiente, edukashon, bienestar di bestia i kuido di salú den e komunidatnan kaminda Sandals Resorts ta operá.

Stewart, kende tambe ta presidente di Sandals Foundation, a bisa ku e ta sinti su mes honrá di por forma parti di e grupo di filántroponan rekonosé pa e revista. El a señalá ku e logro aki ta reflehá e kompromiso amplio di e organisashon pa hasi un diferensia den e komunidatnan kaminda e ta operá.

“E rekonosementu aki tin un nifikashon partikular pa nos, pasobra na Sandals and Beaches Resorts i den henter ATL Group nos sa ku no ta midí éksito solamente pa loke nos ta logra, sino tambe pa e diferensia ku nos ta hasi den bida di otro hende riba e islanan ku nos ta konsiderá nos kas,” asina Stewart a bisa.

El a duna krédito tambe na e 20.000 empleadonan di e kompania den henter Karibe, pa nan kontribushon na e trabou komunitario. El a agregá ku e rekonosementu mester keda kompartí ku henter e organisashon.

Sandals Foundation, fundá pa Stewart na 2009, ta e ala sin fin di lukro di Sandals Resorts International. Via inisiativanan komunitario, edukativo i di medio ambiente, e fundashon a logra di tin impakto positivo riba bida di mas ku 1,5 mion hende den henter Karibe. Sandals Resorts ta kubri e gastunan atministrativo di e fundashon, permitiendo di e forma ei ku tur donashon di públiko/wéspetnan ta bai direktamente pa e proyektonan.

Stewart tabata un di e vários personalidatnan rekonosé internashonalmente, ku e revista a inkluí den su lista. Entre e otronan tabatin e kantante kolombiano Shakira, kende a hasi un donashon di US$1,25 mion pa rekonstruí skolnan despues di un temblor na Colombia; sineasta George Lucas i su kasa, Mellody Hobson, a kontribuí ku US$1 mil mion na Lucas Museum of Narrative Art; i Beyoncé, kende a hasi donashon di US$2 mion na Studio Museum of Harlem na New York.

E rekonosementu aki ta sigui otro distinshon masha bunita ku Stewart a risibí resientemente. Dia 16 di òktober, el a risibí e International Achievement Award durante e Hummingbird Gala 2026 di American Friends of Jamaica na New York, komo rekonosementu pa su kontribushonnan na e mundu empresarial i na filantropia.

Sandals Royal Curaçao na Santa Barbara ta selebrando 4 aña kaba despues di un transformashon formidabel di e anterior Santa Barbara Beach & Golf ku a kosta hopi mion dòler. Sandals Royal Curaçao ta rekonosé entre e resortnan di mas bunita di Sandals Resorts International. ATL Group ta e ramo di e kompania ku ta bende artíkulo pa kas manera erko, frishidèr i wasmashin, miéntras tin un otro ala di ATL ku tin agensia di e outonan KIA, Volkswagen, Audi, Porsche, Honda, BMW, MINI, BYD, Foton, MG, Omoda i Jaecco. Nan tin showroom rònt Jamaica.