WILLEMSTAD.- E landadó yu di Kòrsou Enith Brigitha, medayista olímpiko i mundial i miembro di salon di fama di Federashon Internashonal di Natashon, dia 14 di febrüari awor lo keda homenahiá den Stadion Olímpiko di Amsterdam.

Enith Brigitha aktualmente ta duna lès di natashon na Diemen. Den añanan 70 e tabata e mihó landadó femenino di Ulanda. Na 1974 el a keda premiá komo Deportista Femenino di aña na Ulanda, pareu ku Johan Cruyff ku a risibí e premio komo Deportista Maskulino.

Den un entrevista amplio ku a aparesé riba Internet, Enith Brigitha a papia di su karera. Di forma amplio el a relatá kon el a kuminsá den natashon aki na Kòrsou pa despues sigui na Ulanda. Despues ku el a stòp ku natashon el a biba durante di kasi 20 aña na Kòrsou, pero miéntras tantu ya e tin algun aña atrobe na Ulanda.

Den e entrevista el a papia di forma ekstenso riba su rivalnan di añanan 70, esta e alemannan oriental di kualnan despues a bin resultá ku tur tabata usa sustansia ilegal ku tabata hasi nan mas fuerte. Solamente ku e tempu ei esnan limpi no tabata sa kiko tabata pasando.

Na dos okashon el a partisipá na Weganan Olímpiko. Montreal 1976 tabata bon pa bròns i asina el a sigui gana hopi bròns olímpiko i mundial tras di alemannan oriental.

Enith Brigitha den 2015 na okashon di su instalashon den salon di fama di FINA, a papia ku sierto lamento riba e loke tabata sosodé den natashon i ku a impidié di gana oro. Awor aki e ta ripití esei, djis promé ku Minister Edith Schippers den Olympisch Stadion firma un dedikashon den kua ta pone atenshon riba atletanan limpi.

Tabata na aña 1991 tempu ku e tabata biba aki na Kòrsou, a surgi e notisia ku landadónan di Alemania Oriental (promé ku a basha muraya di Berlin abou) tabata den un programa di doping.

Enith: “Nos tabatin sospecho ku tin algu straño. Te ku 1972 ni un aleman oriental no tabata impreshoná den natashon. Pero diripiente den 1973 i te den añanan 80 ta nan tabata gana tur medaya.

“Ta despues bo ta bai komprondé tur kos. “Mi tabata na un okashon den un internat di natashon na Alemania Oriental. Yen dòkter tabata bin na pisina i ta kue sanger dje landadónan. “Bo no tabata realisá kiko nan ta hasi i bo ta djis pensa ku nan tin tur tipo di fasilidat”.

“Den 1991 bibando na Kòrsou, ma tende e notisia. Nan a detené tur e dòkternan, deportistanan a rekonosé kiko tabata pasa ku nan, inkluso e konsekuensianan médiko i problemanan físiko”.

E ta kòrda ku den kompetensianan no tabatin kontakto ku e alemannan oriental. Esakinan no tabata hasi kontakto i ta despues a bin komprondé ku estado a prohibí pa nan tin kontakto ku otro hende.

Despues ku ya el a retirá, Enith a yega di papia ku su rival di mas grandi Kornelia Ender i ta esaki a pone na su konosementu ku nan no tabatin mag di papia ku landadónan di otro pais.

Den pisina na Kòrsou:

E trainer di natashon Toon Annemaat aki na Kòrsou, tabata esun ku a deskubrí Enith Brigitha.

“Hopi lihé mi tabata esun mas lihé di Kòrsou i Antia te m’a kuminsá train ku e hòmbernan. “Na 1970 mi mama, mi kuater rumannan i ami a muda pa Ulanda. “Mi mama hulandes i mi tata antiano a divorsiá i esei tabata e motibu. E no tabatin nada di haber ku mi karera”.

E promé lunanan e famia a bai biba na Amsterdam, pa despues muda pa Alkmaar.

E ta kòrda ku nan tabata e promé karanan koló skur den kaya. “Ora algu pasa, nan tabata bisa ku ta e muchanan pretu a hasi e kos ei”.

Mas aleu e ta papia dje awa di chloor teribel den kua e mester a train, siendo el a kustumá ku laman Karibe.

Pero el a bin kustumá i dies aña largu a mantené su mes den tòp. Enith ta bisa mas aleu ku e kambio pa bai biba Ulanda ta loke a yud’e, pues e éksito ei e no por a logra nunka estando na Kòrsou pa motibu ku no tabatin e fasilidat.

Despues di Weganan Olímpiko di 1976 Enith a disidí ku e ta stòp, pero finalmente el a hasi esei tres aña despues na edat di 21 aña i ku gana di hasi algu otro den bida.

Tabata e tempu ku el a konosé esun ku despues a bira su kasá. Ku tempu e famia, ku un yu, a bin biba na Kòrsou i a keda durante di 20 aña.

Den e tempu ei el a duna lès di landamentu. Pero ku tempu tòg e famia –e ora ei ku 3 yu- a skohe pa regresá Ulanda.

...Enith Brigitha aktualmente ta duna lès di natashon na Diemen...