LANSING, MICHIGAN, MERKA, AP.- Un eks dòkter deportivo na Michigan ku a abusá seksualmente di mas di un sentenar di mucha i adolesente, inkluyendo gimnastanan, a wòrdu sentensiá djárason entre 40 i 175 aña di prizòn.
E dòkter, Larry Nassar, a wòrdu sentensiá pa hues Rosemarie Aquilina despues di shete dia emoshonal di testimonio di mas di 150 víktima i nan famianan den tribunal di Lansing, Michigan.
“Mi a kaba di firma su sentensia di morto”, asina e hues a bisa na e akusado.
El a agregá ku e delitonan a wòrdu “kalkulá, tabata manipulativo i detestabel”.
“Ta un honor i privilegio pa sentensiá bo”, asina e hues a bisa. “Bo no meresé pa sali for di prizòn. Bo no a hasi nada pa kontrolá e impulsonan aki i unda ku bo bai, e personanan mas vulnerabel lo wòrdu lástima”.
Nassar, di 54 aña, a deklará kulpabel di abusá di shete persona den e zona di Lansing, pero tur víktima ku kier a deklará kontra su persona a haña e oportunidat pa hasi esaki.
E muhénan a indiká ku e dòkter tabata penetrá nan ku su man sin hustifikashon i sin hanskun miéntras nan tabata riba e kama pa hasi tèst. E víktimanan, ku na momentu di e echonan tabata menor di edat, a relatá ku nan a konfia den Nasar, kende a ninga di kere loke a kaba di pasa, òf kende tabatin miedu di hasi un denunsia. Tin biaha e tabata usa un paña òf asta su propio kurpa pa evitá ku e mayor di e muchanan, ku tabata presente na mes momentu den e konsultorio, por a mira kiko e tabata hasiendo.
