WILLEMSTAD.- Ayera tardi e fundashon ‘Curaçao Sail Foundation’ a tene un rueda di prensa kaminda nan a presentá e último detayenan i tambe e programa ofisial pa ‘Velas Latinoamérica Curaçao 2018’ ku ta kuminsá djadumingu awor, 15 di yüli.
Curaçao Sail Foundation, presidí pa Sra. Lucky Ezechiëls a presentá i duna detaye riba tur e aktividatnan ku ta bai tin relashoná ku ‘Velas’.
Fuera di yegada i estadia di 4 dia di e barkunan di bela, konosí komo ‘tallships’ di armada di 8 diferente pais, lo tin tambe oportunidat pa bishita e ‘tallships’, presensia demostrashon di Marina ulandes kombiná ku Kustwacht i Citro, disfrutá di animashon musikal di diferente agrupashon musikal kultural i anochi konsierto grátis riba Plasa Brion.

YEGADA
Djadumingu, 15 di yüli 2018 pa 06.15’or di mainta e aktonan relashoná ku yega di e barkunan di bela lo kuminsá ku e barku Esmeralda di Chile komo promé embarkashon ku lo drenta haf di Kòrsou.
Ku tirunan di kañon esaki lo tuma lugá sigui pa entrada di e sobra barkunan. E entrada den haf di Kòrsou ta wòrdu konsiderá komo un espektákulo kompletu, motibu pa kua a organisá un ‘Happy Velas Walk’ ku lo kuminsá for di 6.30’or di mainta i terminá pa 8.30’or riba Plasa Brion. A sobra algun T-shirt ainda i bo por kumpra esaki pa 10 florin na ‘Top Professional Cleaning’ riba Schout bij nacht Doormanweg. E kaminata lo kuminsá pareu ku e barkunan ta drentando nos haf saliendo for di Plasa Brion pa Prins Hendrik Werf i regresá Plasa Brion.

TOUR PA HOBENNAN
Gruponan di fakansi i gruponan sosial ku ta interesá pa bishita e barkunan por hasi esaki registrando via e number di app +59995604542. E grupo mester konsistí di por lo ménos 15 persona i mayoria mester ta mucha. E orario spesial di bishita pa gruponan lo ta di 9’or di mainta pa 12’or di mèrdia.
Ku eksepshon di djadumingu ku lo ta for di 1’or di mèrdia, sobra dianan tur tantu Kleine Werf komo Motetwerf lo ta habri pa públiko for di 10’or di mainta. Lo tin diferente aktividat riba e dos wafnan i posibilidat pa bishitá e barkunan tambe.

MARINA ULANDES
Marina ulandes su partisipashon den ‘Velas’ lo ta grandi. For di yegada di barku di guera HNLMS Friesland ku lo ta djadumingu, 15 di yüli pa 2’or di mèrdia, Marina ulandes lo kombertí Kleine Werf den un ‘Defense and Sea Village’ ku diferente stènt di informashon i tambe demostrashon. Den bahia di Santa Ana diariamente lo tin demostrashon, tantu parti mainta komo atardi ku partisipashon di Kustwacht, Citro i tambe avion i helikòpter di Marina Real.

MUSIKA
Tur atardi di 5’or pa 8’or di anochi lo tin animashon musikal riba diferente stage tantu na Kleine Werf komo na Motetwerf. Lo tin presentashon di entre otro Dushi Kòrsou, Mini Arnell, Tropical Steelband, Loading Band, Patrick & Friends, Grupo Komper, Rubeba, Future Band, Típiko Pasa Bon, Rhyddm, Sablika i Marinierskapel.

KONSIERTO
Riba djadumingu, djaluna i djamars lo tin konsierto riba Plasa Brion. Djadumingu lo tin presentashon di Junior Tecla i Vibenation, djaluna ta toka turno pa Axel & Friends sigui pa Marinierskapel ku Izaline Calister i djamars ta ERA den antesala i ta sera ‘Velas’ ku presentashon di Oscar d’Leon.
Den e dianan ku ta sigui ‘DEN E BEMBE’ lo sigui kompartí mas informashon relashoná ku e gran aktividat ‘Velas Latinoamérica Curaçao 2018’.