WILLEMSTAD.- Riba e lista ofisial di Fundashon Kultural Seú Kòrsou tabatin pone ku grupo di Seú ‘Kosecha di Koko’ lo a partisipá na Marcha di Seú ku kompañamentu musikal di ERA.
Ta resultá awor ku niun momentu esaki no tabata kuadra ku realidat. E impreshon a keda krea i pa evitá esaki ERA a saka un komunikado pa aklará e situashon.

KOMUNIKADO
‘Mediante di esaki gerensia di ERA, kier  a informá tantu fanátikonan i tambe pueblo di Kòrsou ku ERA no a partisipá na Marcha di Seú 2017.
E agrupashon musikal ku tabata den marcha di Seú den ningun forma tin òf tabatin vínkulo ku ERA òf tin un akuerdo pa representá ERA den ningun forma.
Aparentemente e doño di e grupo di Seú a disidí ku e ta bai usa nòmber di ERA sin pèrmit, apesar ku a indik’é na vários okashon ku agrupashon musikal ERA a optá pa no partisipá den Marcha di Seú 2017.
Gerensia di ERA ta lamentá ku tin sierto hendenan tin e kurashi pa kometé aktonan aki i no ta aprobá ku ta usa nòmber di ERA sin pèrmit, paso un posibel mal presentashon i òf komportashon, lo por tin konsekuensia pa ERA’.