WILLEMSTAD.- Ayera nochi nos a bishitá e ensayo di ERA na Klup di Shell. ERA e aña aki ta partisipando den Festival di Tumba ku 5 komposishon. Dos di Bibi Gonet i 1 di Cuco, Hendrik i Oko Dap. Eks Rei di Tumba, Hendrik de Windt, ganadó di 3 Festival di Tumba ta bèk despues di un par di aña ousente komo kantante. Komo kompositor si el a sigui kompetí. Gabriello ‘Cuco’ Cruz su number mágiko ta 33, 33 aña partisipando na Festival di Tumba i e aña aki empatando ku e legendario Harry Zimmerman. E karanan yòn di ERA, Sherel Denisia i Tyeisha Bernabela tin tur wowo riba nan. Sherel ku un tumba komponé pa Oko Dap, ku segun informashon lo a wòrdu komponé pa Rich Pieter, pero ku na último momentu a kambia di intérprete. Tyeisha ta partisipando un biaha mas ku Bibi Gonet komo su kompositor. Por último Cuco Bregita tei partisipá ku un komposishon di Bibi Gonet i areglo di Ravello Antoin. Mester menshoná ku dje 5 tumbanan di ERA, Ravello tin 4 areglo na su enkargo i Borrel Dopwell tin 1 ku el a areglá. E reportahe gráfiko ta di e ensayo di ayera nochi.