WILLEMSTAD.-Ta un kustumber ku agrupashon musikal ERA ta selebrá nan  aniversario den farándula en grande. E aña aki ta toka turno na Landhuis Brakkeput Mei Mei 14 di aprel próksimo pa selebrashon di e di 36 aniversario di ERA.
Den kuadro di e selebrashon aki a sostené un rueda di prensa ayera na Licores Maduro, kaminda a hasi menshon di entre otro "line up", splikashon di e konsepto "eat, drink and dance" i "gimmick".
Manera ya ta konosí "line up" di e aña aki ta repartí den 2 area; Area 1- ERA, Oreo i Dj Argenis Huerta i Area 2- Gentz. Fuera di e tremendo "line up" e konsepto "eat, drink and dance" ta brinda públiko oportunidat pa disfrutá di diferente "food station" durante di e evento.
Igual na aña pasá e aña aki tambe ta duna komunidat oportunidat pa por kumpra karchi na un preis redusí.
Djasabra awor, 17 di mart lo tin 200 karchi optenibel na balor di 36 florin, por probechá di e "gimmick" aki únikamente na Licores Maduro kuminsando for 9’or di mainta. Ta usual ku e karchinan aki ta bai 'manera pan kayente' pues pèrkurá pa bo ta trempan pa kumpra di bo. Despues di esaki por hasi uzo di puntonan di benta kual ta; Beep Beep, Mensing's, Tik Tak i 24 uur uit de muur.
Tene na kuenta ku e evento aki ta kuminsá 8’or i terminá 2’or, lokual por sigurá bu ta, un anochi yená ku Alegria!.