EASLEY SC.-  Baltimore Orioles a kambia Jonathan Schoop den pitu o sea den “deadline”  pa kambionan tuma lugá ayera tardi. Ernst Meyer scout di Baltimore ku a firma Jonathan Schoop a keda tòg sorprendí aunke e nòmber di Jonathan Schoop a keda menshoná durante e periodo di kambionan, pero a spera ku Baltimore lo a rekonsiderá e intenshon pa kambia John.

“ E kos a sorprendé mi i ta un lástima ku esaki a sosodé “ Meyer a bisa den un promé reakshon. Meyer a risibí e notisia nèt na momentu ku Kòrsou tabata hungando kontra Venezuela den e kampionato mundial di Senior League  huntu ku otro scout di Baltimore ku tabata presente pa mira nos hóbennan den akshon, ayera kende tambe a keda sorprendí pasó no tabata un desishon asina fásil pa laga Schoop bai.

Ernst Meyer a bisa ku Baltimore Orioles a laga kasi tur e mihó hungadónan bai i ku awor mester bai trese otro hungadónan hóben pa drecha e ekipo pa próksimo añanan. Riba nos pregunta,  ku e kambio aki lo por tin konsekuensia pa Sharlon Wecho Schoop ruman di Jonathan Schoop den Baltimore,  Meyer no por a duna un kontesta afirmativo.

Pa esnan ku semper ta lesa Mundu Deportivo mester ta kòrda den entrevistanan den springtraining e aña aki ku Jonathan Schoop reakshonando riba e posibel kambio di su amigu stimá Manny Machado e aña aki,  el a bisa ku si Machado lo mester bai esei lo no afektá nan amistat ta meskos ku si e tambe lo mester bai e aña aki for di Baltimore Orioles.

Ta manera Jonathan Schoop tabata mira e situashon aki presentá mirando ku awor ni e ni Machado no ta forma parti di Baltimore Orioles mas. Nos ke deseá éksito na Jonathan Schoop ku últimamente ta super kayente na bate i nos ta spera ku el o sigui asina ei den Brewers.