WILLEMSTAD.- Espektativa ta haltu pa e festival ‘Un Kanto pa Kòrsou’ ku ta tuma lugá djadumingu awor. Ensayonan a kana segun plan i músikonan ku mester a yega for di Venezuela pa reforsá e orkesta su sekshon di ‘brass’ tambe ta na Kòrsou. ‘DEN E BEMBE’ a kombersá ku Feco Gomes i e tabata kontentu kon ensayonan tabata kanando. ‘Den e siman aki tabatin un kontratempu chikí pa loke ta trata yegada di e músikonan for di Venezuela, pero esaki ya a keda resolvé’, asina Feco a indiká. Nos tin tres dia mas di ensayo pa bai i nos ta sigur ku djadumingu awor e 14 kantantenan ku lo presentá lo pèrkurá pa duna un tremendo presentashon i ku kanta e grandesa di Kòrsou. Festival ‘Un Kanto pa Kòrsou’ ta dediká e aña aki na e gran kantante, Melania van der Veen. Festival ‘Un Kanto pa Kòrsou’ ta tuma lugá djadumingu awor, 3 di yüni pa 7.30’or di anochi na Landhuis Brakkeput Mei Mei. Un total di 14 kantante ta partisipando e aña aki na e festival. Karchinan ta optenibel na 24 uur uit de muur, Boekhandel Samson i na Festival Center.