WILLEMSTAD.- Ayera anochi tabata e estreno di e dokumental Luis Brion, Almirante di Libertat. E plasa sentral den Otrobanda na Kòrsou  ta karga su number, tin un skol i un waf ku yama Brion, i tur  aña  mandatario  i interesadonan ta hisa bandera pa rekord’é, pero fuera di esei rekuerdo na e héroe naval di Kòrsou Luis Brion (1782-1821), e promé atmiral di Repúblika Gran Colombia, a bira vago.

Ta di spera ku e aktitut aki lo bin kambia, awor ku muestra riba un dokumental,  ku lo kontribuí na tene e rekuerdonan bibu, trese mas amor pa patria i partikularmente mas atenshon i konosementu serka nos hubentut ku ta lanta.

Pa haña sa mas di historia karibeño turbulento durante kambio di siglo 18 pa 19, di tempu ku isla Kòrsou dos biaha a keda rondoná dor di inglesnan, tempu di batayanan sangriento entre monarkista i republikanonan, di pirata i luchadónan pa libertat, a traha e dokumental aki di atmiral hóben, alabes un dunadó di sèn importante na e lucha pa independensia di  Simon Bolívar.

A estrená e dokumental di 35 minüt Luis Brion, Almirante di Libertat riba djaluna 25 di   sèptèmber 2017, bispu di dia di konmemorashon di su fayesimentu, en kooperashon ku  Biblioteka Nashonal Kòrsou Frank Martinus Arion i  Fundashon Almirante Luis Brion. Den luna aki lo tin dos presentashon tambe na Riohacha i Bogotá, Colombia den kuadro di un konferensia tokante Historia di Hende di Laman.

E esenario di e dokumental aki ta e laman Karibe yen di isla i pegá na e paisnan inmenso ku  selvanan tropikal kòrtá ku riunan grandi di Orinoco i Riu Magdalena. E geografia, e papel di Kòrsou di plama e ideanan di igualdat i e lealtat di Brion pa su lider Bolívar, su amor patriotismo pa su isla, ta pará sentral den e dokumentario Luis Brion, Almirante di Libertat.

E tim di produkshon ku ta konsistí di Ieteke’Inchi’ Witteveen i e Cubano-Venesolano Armando Galindo a hasi grabashon na sitionan kaminda Luis Brion a hiba batayanan desisivo na tera, riba laman i riunan.

Asina a filma na lugánan konosí na Kòrsou ku tin di aber ku e bida di Luis Brion, su relashon di bida riba e isla Margarita i islanan Los Frailes, kaminda batayanan naval a tuma lugá riba e riu Orinoco i na siudat Bolívar den Venezuela. Bou di mando di Brion batayanan sangriento a tuma lugá na kosta kolombiano, kaminda e riu Magdalena, e siudat Cartagena, Santa Marta, Riohacha a ser liberá di nan opresornan.

Sosten finansiero pa e proyekto aki ku un presupuesto limitá a bini di PDVSA/ Refineria Isla, Dick & Doof, MCB- Bank, Damen i di ORCO-Bank di Kòrsou. Fundashon Material pa Skol tabata enkargá ku e tradukshon spañó - papiamentu. Sra. Grace Jonkhout a hasi e transkripshon i tradukshon papiamentu - spañó.