WILLEMSTAD.- Pa di ocho aña konsekutivo Estreno MAS Pikete(EMP) lo tei pa selebrá huntu ku pueblo di Kòrsou den karnaval 2020!
Mané a bira un kustumber kaba Estreno MAS Pikete lo tei ku hopi ambiente, inovashon i kreatividat. Ayera nochi Estreno MAS Pikete a presentá nan trahenan, diferente i impaktante ku nan lo desfilá kuné den karnaval 2020, pa e di 50 edishon di nos karnaval. E trahe ta bunita, luhoso, trendy i ku un preis pagabel pa un i tur por partisipá i yuda engrandesé nos karnaval.
Den un presentashon di trahe pa públiko den Riffort, Estreno MAS Pikete a revelá nan tema ku ta unu ku ta pone tur hende den marcha pero tambe na kantu, pega riba otro manera e mosaikonan den nan trahe.
Den e ‘Golden Age of Egypt’ nan lo trese e fantasia di mosaiko unda e miembronan di EMP lo baila, gosa i bula sin fin den e kayanan di nos dushi Kòrsou kuné. Un danki ta bai spesialmente na sra. Rudt Sintiago ku semper tin idea kreativo ku ta hala atenshon. Mané nan ta bisa ‘ Innovation is the key’.
E aña aki EMP lo bai e biahe aki ku e bandanan L.O.G. , Dolce i tambe Cache Royal. Sin lubidá e ‘Urban area’ unda lo tin tur e DJ nan hot i tambe Poke i Ata Niro. Mané tur aña di nobo tin inovashon i por spera esaki e aña aki tambe. EMP ta un famia ku tin ambiente, kalor i Hopi Kreatividat.
EMP ta invitá bo pa like nan facebook page "Estreno Mas Pikete" pa asina tur hende por keda na altura di tur e trabounan rumbo pa Karnaval 2020. Pa mas informashon por subi nan wèpsait: www.estrenomaspikete.com òf por manda un meil na Estrenomaspikete@gmail.com