WILLEMSTAD.- Ayera ‘DEN E BEMBE’ a duna un kobertura na e presentashon di trahe di Estreno MAS Pikete i su sekshon mas luho, Estreno YEN Pikete, pero loke nos tabata falta ta e tema dje grupo i un deskripshon di loke nan ta bai presentá.
Awe nos ta kompartí tur e informashon.
Estreno MAS Pikete i tambe e sekshon mas luho, Estreno Yen Pikete, a revelá nan tema ku ta unu ku ta pone tur hende den marcha pero tambe na kantu, bula di alegria manera e " Mandarin Fish" ! Den e fantasia di Mandarin Fish, un di e piskánan mas kolorido i bunita di laman,  miembronan di Estreno lo baila, gosa i bula sin fin den e kayanan di nos dushi Kòrsou.
Un danki ta bai espesialmente na diseñadó Juan Carlos Padrino i sra. Rudt Sintiago ku semper tin nan diseñonan ku ta hala atenshon.
Pa 2019 EMP lo bai un biaha mas ku su tres bandanan di aña pasá, esta nan banda di kas Dreams, Dolce i Legends of the Game. Tambe den e "urban area"  por haña nos dj nan di mas popular, entre otro DJ RO-1, DJ Krokzz i MC Chris Strick.
Tur hende ta kustumbrá ku tur aña di nobo tin inovashon. Por spera esaki e aña aki tambe. EMP ta un famia ku tin ambiente, kalor i hopi kreatividat! EMP ta invitá bo pa ‘like’ nan facebook page "Estreno Mas Pikete" pa asina tur hende por keda na altura di tur e trabounan rumbo pa Karnaval 2019. Pa mas informashon por subi nan wèpsait: www.estrenomaspikete.com òf por manda un e-mail na estrenomaspikete@gmail.com.