WILLEMSTAD.-  Dos konosido pianista yu di tera ta estrená muzik nobo na Sentro Kultural Kòrsou su Akademia di Músika Edgar Palm djasabra 30 di yüni. Norman Morón ta presentá un komposishon nobo masha bunita mes pa piano i orkesta di fió.
Enrico Henriquez, ku tabata pianista di Oscar D’Leon, ta presentá su 4Rteto Krioyo konsistiendo di e mes, Arjen de Graaf (fió), Clark Elisabeth (bas) i Gilbert Braaf (drùms)
E estrenonan aki tur dos lo tuma lugá durante un konsierto pa rekoudá fondo pa e orkesta di fió di Sentro Kultural Kòrsou (CCC), Young Strings CCC.
Morón a areglá un komposishon nobo masha bunita i romántiko spesial pa e grupo di hóben violinista talentoso aki di CCC, ku ta kompañé den e presentashon.
4Rteto Krioyo ta toka muzik típiko di Kòrsou pero ku un sous di baròk i ritmonan purá venezolano, komponé pa Enrico Henriquez.
Alumnonan di fió i cello i miembronan di Young Strings CCC tambe lo duna presentashon, E konsierto ta kuminsá 5’or di atardi den e sala di CCC na Koninginnelaan den Emmastad, pegá ku International School. Ainda tin algun karchi optenibel na porta o via 737-3510 na rason di 25 florin.
Riba e potrètnan por mira parti di e grupo di fio den ensayo ku Morón.