WILLEMSTAD.- Tres aña pasa Grupo Estreno di Pikete a kumpli 40 aña i pa e okashon ei, e grupo a invitá tur e miembronan ku den pasado tabata forma parti di Estreno pa nan tambe bolbe  partisipá komo baluarte i pa esei Estreno a laga traha un trailer spesial.

E trailer aki a haña e nòmber di e trailer di Baluartenan di Estreno. 2 aña pasa un kantidat di 40 baluarte a partisipá i tur hende a gosa i pasa masha dushi mes riba e trailer. Klaro ku tur e partisipantenan a keda ku hopi gana di bolbe partisipá den e añanan despues.

Pa motibu logístiko esaki no tabata posibel aña pasa, pero e aña aki Edgar Zimmerman i Magareth  Justina- Janse for di tempran a komuniká tur baluarte ku ta interesá ku nan lo ta den karnaval 2019.  29 persona a duna di konosé ku nan ta interesá i e grupo a djòin Estreno  bou di e nòmber Estreno Royal Pikete.

E grupo tabata  tin un trailer spesial kaminda tur e grupo por a partisipá ariba. Nan trahe tabata unu ku a kuadra ku e tema grandi di Estreno di Pikete ku a bai ku e tema: Piskánan Mandarin.

E grupo Estreno Royal Pikete tabata bisti na Zues i Atlanta ku ta Rei i Reina di Oséano.  E trailer di Estreno Royal Pikete tabata representá un barku grandi riba  kual tur e Rei i Reinanan tabata  jump riba ritmo di Era. Na e barku tabata tin diferente kosnan di laman pega, manera diferente kokolishi i  “zeeappel”. Ta bisto ku e barku tabata transportá Rei i Reina di laman, ya ku e trailer tabata dòrna di un manera festivo.

Ta di apresiá ku Estreno di Pikete a habri e oportunidat pa e baluartenan tambe por partisipá den karnaval ya ku ta un kos ku hopi di e baluartenan aki kier a keda hasi i ku e trailer esaki a duna e oportunidat ideal pa nan keda parti di e totalidat di Karnaval di Kòrsou. Si mira kon e grupo tabata gosa di e karnaval e aña aki sin mas por   bisa  ku e idea aki ta unu genial.

Ya kaba mayoria di e partisipantenan a duna e indikashon ku nan ke sigui partisipá. Edgar Zimmerman i Margaret Justina Janse tin komo tarea pa sòru pa esaki materialisá den e añanan ku ta bini.  Sra. Maria Liberia kende ta un karnavalista di alma ya a puntra kaba ki dia ta kuminsá ku preparashon pa karnaval 2020. Teniendo kuenta ku otro aña ta selebrashon di 50 aña di Karnaval e grupo sigur ta kere ku nan no por keda afó. Pues trabou tin. Riba e potrètnan por mira algun potrètnan di e baluartenan riba i pafó di e trailer tabata gosando di e ambiente di Karnaval.