WILLEMSTAD.- Riba djasabra 26 di mei 2018, Rudsel van Lamoen a presentá su promé tomo di poesia: Est’un Kòrsou! Riba dia di su kumpleaño e outor a tene un presentashon públiko selektá na Lanthùis Groot Davelaar (University of Dutch Caribbean).
Rudsel van Lamoen ta konosí pa su hopi añanan di labor den periodismo i tambe pa su aktividatnan den atletismo. Pues awor ku su publikashon di poesia, komunidat ta konosé un aspekto mas di su persona.
Dilanti den e buki, den su prólogo, e outor mes ta nota ku den e tomo e poesia aki e ta publiká un kolekshon di poema ku el a skirbi entre 1995 i 2015. Seguidamente e ta menshoná ku e poemanan tin komo tópiko, amor pa su pais, bida di tur dia, un krenchi di humor i pensamentu personal riba stimashon. El a laga su poemanan para un ratu, mientrastantu e tabata añadí, revisá, reskribí, kambia punto i kòma. Est’un Kòrsou ta un eskoho apropiá, ku balor patriótiko.

Ku presentashon di su buki, Rudsel van Lamoen ta djòin e fila di poetanan di literatura papiamentu i ta drenta na un manera digno, ku poesia bunita, elegante, atraktivo i fuerte. Por papia di un poeta debutante ku obra literario presioso.
Tantu riba portada komo parti paden di e buki ta figurá bunita potrètnan di e konosido fotógrafo Henky Looman. E buki tambe ta kontené pinturanan di sra. Zarja Garmers-Rojer.
Ronnie Severing a duna e outor asistensia redakshonal i a introdusí e buki djasabra último.
Na okashon di presentashon di Est’un Kòrsou, netamente sra. Zarja Garmers-Rojer i Ronnie Severing a sirbi komo madrina i padrino, respektivamente. Señora esposa dje outor, Lisette van Lamoen-Garmers, a fungi komo MC durante dje anochi.
Est’un Kòrsou ta optenibel na librerianan lokal na rason di Fl. 26,50.