WILLEMSTAD.- E empresa MPOWR, dirigí pa Evita Sanchez a emití un komunikado dirigí na kualke persona ku a sufri daño finansiero komo resultado di e kanselashon di Curaçao Ponton Festival. Relashoná ku esaki MPOWR ta aklará lo siguiente.
‘ Curaçao Ponton Festival a keda organisá pa SuMusica Curaçao BV. Entre e organisadó i MPOWR tabatin un kontrakt será pa merkadeá e proyekto. E kuadronan den e kontrato a konsistí eksklusivamente na aktividatnan di merkadeo i relashon públiko pa banda di MPOWR na nòmber di SuMusica Curaçao BV, kual trabou a keda hasi konforme loke a keda palabrá i profeshonalmente hasi.
Apart di e merkadeo i relashon públiko MPOWR no a keda asigná niun otro tarea òf responsabilidat. Loke ta indiká ku e no a asumí niun responsabilidat finansiero den e proyekto.
Ku kanselashon di e Festival, e akuerdo i tur otro akuerdonan entre e organisadó i MPOWR a terminá di forma inmediato. MPOWR no tabatin bista ni partisipashon den e sirkunstansianan ku a pone ku a kanselá e evento i ta obligá di distansia su mes di tur partisipashon den esaki.
MPOWR ta solisitá pa tur hende ku a bira víktima di e situashon pa nan pone nan mes den kontakto ku e organisadó pa nan por rekobrá nan sèn.
MPOWR no por para responsabel pa esaki. Sobrá interesadonan tambe ta wòrdu dirigí na e organisadó pa kualke pregunta, komentario òf informashon relashoná ku Curaçao Ponton Festival.
Klientenan di MPOWR ku debí na e situashon ku a presentá a bira víktima, e empresa ta ofresé su diskulpa pa ku esaki.
MPOWR ta spera ku mas pronto posibel lo por yega na un akuerdo entre e organisadó i tur esnan ku a bira víktima’.