WILLEMSTAD.- Riba 1e di mei 2018 “Excel Arts Academy” a risibí e grato notisia ku di e kantidat di 12 organisashon den Reino Ulandes ku a keda nominá pa e premio “Appeltjes van Oranje” nan a resultá ganadó huntu ku dos otro organisashon na Ulanda.
E premio “Appeltjes van Oranje” tur aña ta keda otorgá na 3 organisashon den Reino Ulandes ku ta sirbi nan komunidat di un forma partikular. Kada aña e premio ta sentrá rondó di un otro tema. E biaha aki Oranje Fonds a disidí di pone lus riba hóbennan bou di 35 aña di edat ku a inisiá proyektonan ku ta dediká pa konektá i envolví grupo di personanan vulnerabel i ku a resultá den inisiativanan balioso pa komunidat.
Sr. Peter Douwes, direktor di Stichting Oranje Fonds, a bisa ku nan ta diskubrí mas i mas inisiativa ku ta bini di hóbennan ku ta generá hopi positivismo i nan ta di opinion ku e storianan aki mester keda kontá, pa asina otro hóbennan tambe por keda inspirá pa dediká nan bida na otronan. “Ta bon pa laga sa ku un persona no ta muchu hóben pa hasi un diferensia den su komunidat”.
“Excel Arts Academy” ta eksistí for di aña 2000 i ta un inisiativa i vishon di Shelomi Doran-Bakhuis. Komo fundashon e akademia di arte aki ta aktivo for di 2006. E ta duna formashon artístiko i personal na mucha, hóben i adolesentenan. Loke ta remarkabel di e akademia aki ta, ku e ta hasi uso di arte komo medio pa forma e studiantenan komo personanan ehemplar i ekselente ku ta kapas pa duna un aporte na nan komunidat.
Durante 3 aña e studiantenan ta risibí preparashon den diferente tipo di arte manera entre otro baile, drama, drumband, kanto, lírika i téknikanan di sirko. Kada studiante ta risibí un mentor ku ta gui’e den su desaroyo i sostené den diferente área di su bida.
Durante e temporada ku e studiante ta pasa den e kuríkulo di e akademia, e lidernan ta duna atenshon tambe na su talentonan ku te na e momentu ei por tabata skondí i tambe na su kalidatnan di liderazgo.
E método di e akademia aki a duna debido resultado i mayoria di su lidernan kendenan a kuminsá komo alumno, awe ta personanan ku ta resaltá den diferente área den nos komunidat.
“Excel Arts Academy “ ta konsiderá  otorgamentu di e premio “Appeltjes van Oranje” na nan komo organisashon komo un gran honor i tambe komo rekonosimentu di e vishon i trabou duru di nan direktora i tur esnan ku a sosten’é den e trabou aki.
Ku gratitut den nan kurason na pueblo di Kòrsou pa e konfiansa ku nan ta risibiendo pa por sigui forma mucha i hóbennan komo artista i personanan ekselente den nos komunidat, na luna di yüni próksimo, un delegashon di “Excel Arts Academy” lo biaha pa Ulanda pa risibí e prestigioso premio aki for di man di su ekselensia Reina Maxima na Palasio Noordeinde, Den Haag.