WILLEMSTAD.- For di djasabra te ku djamars último EXTRA su página di Facebook a konta ku un asistensia bárbaro pa loke ta trata oudiensia di diferente transmishon ku a wòrdu hasí. A transmití e yegada di e barkunan di bela pa Velas Latinoamérica Curaçao 2018, konsierto di Junior Tecla, Marinierskapel ku Izaline Calister i konsierto di ERA i Oscar de Leon djamars último. Apart di esaki tabatin tambe e publikashon dje entrevista di Anne Marie Braafheid, kende 50 aña pasá a logra puesto number 2 den e sertámen di Miss Universe.
E entrevista di Anne Marie Braafheid a surpasá 31 mil persona ku a wak e video.
Pa loke ta trata e konsiertonan, sin muchu promoshon e transmishon a logra di akapará un tremendo oudiensia ku a pèrkurá tambe pa un porsentahe haltu di oudiensia durante henter e transmishon.
Esnan ku a sigui e transmishon tabata un públiko prinsipalmente di Kòrsou mes, pero tambe basta hende for di Ulanda, Venezuela, Canada i Peru.
E loke mas a impreshoná tambe ta ku sigur e públiko a wak e transmishonnan ku un porsentahe haltu di 99.7 %.
E presentashon ERA i Oscar de Leon tabatin un oudiensia di riba 84 mil hende di kua praktikamente tur a wak e transmishon kompletu.

E konsierto di Marinierskapel ku Izaline Calister a logra atraé riba 16 mil i nan a disfrutá di kasi 2 ora di konsierto. E kantidat di siguidó na Ulanda durante di e konsierto di Marinierskapel i Izaline tabata bon pa kasi 10%, loke pa e diferensia di orario ta hopi bon.
Un danki di kurason na Curaçao Sail Foundation ku no a duda niun momentu ora ku nan a keda aserka pa EXTRA pa hasi e transmishon. Na e tim di Q Productions ku a hasi e produkshon di video, un pabien pa un tremendo produkshon.

EXTRA ta sigui traha pa ofresé su siguidónan produkshonnan di nivel. Keda pendiente pa mas dje tim di produkshon di EXTRA su departamento digital.