WILLEMSTAD.- ‘Velas Latinoamerica Curaçao 2018’ ta ofresé pueblo di Kòrsou tres anochi di konsierto grátis riba Brionplein. Ayera nochi tabata e promé anochi ku presentashon di Junior Tecla i e sekshon digital di bo korant faborito, Extra, Extra Digital a transmití e apertura ofisial di Velas i e presentashon di tantu Marinierskapel i Junior Tecla i Vibenation. Pa awe nochi lo tin kobertura di e di dos anochi i meskos lo ta e kaso pa mañan anochi. Naturalmente e invitashon pa abo asistí i disfrutá di dos anochi di konsierto ku artistanan di taya manera Izaline Calister i Oscar D’Leon ta keda hasi pa dje forma ei yena Brionplein ku públiko. Si dado kaso bo no ta logra asistí, no preokupá EXTRA ta ofresé bu e konsierto via di su página di facebook ‘Extra Curaçao’. Nos ta topa awe nochi na Brionplein, si no, manda bo mensahe via di facebook pa nos tin bo komentario relashoná ku e transmishon i konsierto.