Fanátikonan di Little League, bon dia i felis wikènt un biaha mas. Nos tei riba e último fecha di e kolumna di Intermediate.  Danki pa e reakshonnan ku nos a risibí di esnan ku ta sigi Little League hopi djaserka. Extra digital a lusi atrobe ku su crew profeshonal, tantu di narashon komo e parti tékniko i e personal tras di kamara. Keda pendiente pa mas di transmishonnan den futuro. Pa otro aña segun nos tin kampionato di Latino òf di Karibe atrobe na Kòrsou. By the way, Felis Dia di Bandera pa tur Yu di Kòrsou tantu esnan bibá na Kòrsou komo esnan den eksterior. Dia di Bandera a kai riba djasabra ke mèn no tin dia liber pa trahadónan.

* * * * *

Ayera mester tabatin wega entre Aruba i Colombia i einan e number 4 lo keda disidí pa despues hunga e play-offnan semi-final. Wega entre ekiponan 2 i 3 lo tuma lugá pa 4’or i 1 vs 4 lo tuma luga 7’or.  Interesante pa sa si maneho tékniko di nos selekshonnan ta opta pa laga nan picher number 1 pa final òf ta manda nan mihó picher pa semi-final. Hopi manager ta bisa ku nan ta bai pa gana e weganan unu pa unu, espeshalmente ora ta trata di weganan eliminatorio esta dal saka, ke mèn play-off.  Interesante loke ta trata maneho den Little League ku no ta niun tiki fásil.

* * * * *

Selekshonnan di Kòrsou lo sali djadumingu pa 7.20’or pa Punta Cana. Selekshonnan di Pabou i Pariba lo move ku gran kantidat di fanátiko pa República Dominicana. Nan lo keda den Impressive Hotel i dos bus lo transportá nan di e aeropuerto di Punta Cana.  Dos delegashon masha grandi kargá ku fanátiko lo move pa Punta Cana ku avion charter. Lo ta un eksperensia úniko pa e hungadó- i fanátikonan. Little League World Series lo ta di 9 pa 15 di ougùstùs na Williamsport.

* * * * *

Bèk pa Intermediate na Kòrsou, nos a traha e kolumna aki na momentu ku Colombia tabata enfrentando Aruba ku Colombia ganá ku skor di 7 pa 4. Ganadó di e wega aki lo klasifiká sea na di 4 lugá òf na di 3 lugá.  Pabou a terminá number 1 ku rekòrt di 4 ganá i 0 pèrdí. Despues di e wega di Colombia lo bira konosí kua ekipo ta klasifiká number 2, 3 i 4. Pa Loke ta Aruba ta selekshon di Center League a gana den Intermediate i ta nan ta na Kòrsou. Colombia a manda selekshon di Cartagena di Falcon Little League. Meksiko ta representá pa selekshon Oriente. Selekshon di Nuevo Laredo ta presentá na Kòrsou.

* * * * *

Bon trabou di e komishon organisadó enkabesá pa presidente Norval Faneyte, sekretario Bryano Goilo, direktor di kampionato, Roland Chirino, Umpire en hefe, Sandley Martina i Neldreick Lourens enkargá ku instalashonnan na Post 6 i tereno di wega, Unry Nahr ta komisario general i Marelva Clementina ta enkargá ku hospitalidat.  E kampionato ta un éksito kompletu apesar ku mester a ahustá formal na momentu ku Siklon Tropikal Bonnie tabata riba kaminda. 4  kuerpo di transmishon, via e plataformanan i tambe Extra Digital riba diferente plataforma tabata Facebook, You Tube i Extra.cw. Nos ta keda te aki ku e informashonnan pendiente pa e resultado di Colombia/Aruba. Te otro okashon...