WILLEMSTAD.- E dia a yega, mañan djadumingu, 19 di yanüari 2020 ta fecha pa Inskripshon di Festival di Tumba 2020. Korant EXTRA a primintí i nos tei kumpli.
PLATAFORMA
Pa mañan lo bo por sigui EXTRA riba su dos plataformanan Digital ku ta riba facebook: extracuracao i YouTube: extracuracao. Aserka nos ta informá awe ku e transmishon lo pasa tambe riba Kanalnan 75 i 76 di TDS. E aña aki pa promé biaha lo bo por sigui nos tambe riba kanal 050 di FLOW. Un dje páginanan di farándula masha popular di facebook na Kòrsou, Aruba i Boneiru ta ESO. Nan tambe a djòin e transmishon i su siguidónan tambe por disfrutá dje transmishon di EXTRA.
TERTULIA
E transmishon ta kuminsá pa 12 or di mèrdia ku presentashon di ‘Tertulia ku nos Reinan di Tumba’, un produkshon di EXTRA ku e 8 tumberonan ku a gana e korona na 3 okashon. Nan lo sinta huntu i interkambiá di eksperensia i tambe anektodanan di Festival di Tumba. Algu ku sigur bo no mag di pèrdè.
INSKRIPSHON
Pe aña aki e transmishon di Inskripshon lo tin kuater anfitrion, tres biaha Rei di Tumba Rubertico ‘Tico’ Balentien, Sue Cijntje, Tony Castro i Luis Curiel. Nan lo presentá for di e apertura ofisial ku lo ta 2 or di mèrdia te na momentu ku saka e órden di presentashon di bandanan.
Un variashon di entrevista, yegada di artistanan, kombersashon ku músikonan i partisipantenan. Esaki kombiná ku un bista kompletu dje ambiente den Curaçao Festival Center.
GANA RED CARPET
No lubidá pa bo yena bo formulario ku ta aparesé den korant EXTRA pa bo gana dos pakete di Red Carpet pa Festival di Tumba 2020. Mas formulario bo yena mas chèns bo tin pa gana.
EXTRA PA SU KUENTA
Den Karnaval 50 EXTRA ta pa su kuenta. E transmishon di Inskripshon di Festival di Tumba ta un dje eventonan ku EXTRA lo duna kobertura di dje durante dje temporada aki di Karnaval. Keda pendiente pa e otro aktividatnan ku EXTRA lo bai transmití.